Aise Hote Hain Muhammad (S.A.W.W) Ke Gharaane Waale

Bhooke reh kar bhi zamane ko khilaane waale
Aise hote hain Muhammad ke gharaane waale

Aaj jo Shah ki majlis mein hain aane waale
Kal wahi log hain firdaus mein jaane waale

Poochhti hai ye Sakina (A.S) kab aayenge Baba (A.S)
Kaun dukhiya se kahe ab nahin aane waale

Shah (A.S) ne Asghar (A.S) ki shahadat pe ye farmaya hai
Apne waade ko nibhaate hain nibhaane waale

Aag un ko na jala paayegi dozakh ki kabhi
Gham-e-Sarwar mein hain aansoo jo bahaane waale

Hum ko har bahr-e-museebat se bacha lete hain
Kashti-e-Nooh ko toofaan se bachaane waale

Az paye Ghaus-e-Khuda uqda mera hal keeje
Aap ke dar siwa hum kahan jaane waale

Kal ko kausar bhi wahi log piyenge, Abrar
Naam-e-Maula pe hain paani jo pilaane waale